شَــركْ المحبّة...
شَـرَكْ المَحَبّة اصْطَـادْ.. دُونْ العِبَـادْ
حُصُلْـتْ فِي وَهْـجْ وَڨّـادْ.. ربّـي رَادْ
بْقِيتْ وَحْـدي فْـرَادْ.. فَـاضي الـزّادْ
مڨْطُوع مَالِي أمَّـالي ..
فِي وَطنْ خَـالي
ولا مِنْ غاضُو حَـالِي ...
شْـرَكْ المحَبّـة كْبِـسْ.. حَـلّ الفِلِـسْ
حسّيت عِنْدي هَوَسْ..حظّي عكَسْ
ولّيتْ صَاحِبْ خُمُـسْ.. بَعْـد النُّـصْ
وْبَـعـد اللّي كُنت مَـالِكْ
زُرتْ الـمْـهَـالِكْ..
ويا عَمْلِتِي ويَـا اعمَـالِكْ...
شَـرْكْ المَحَبٌـة ظَلَـمْ .. مَـسّْ العَظَـمْ
حسّيت مالي قلَـمْ.. كَـاتـبْ ارْشَـمْ
وْصِفْ وجْعَتي ومَا انْتَمْ..صحّح بَصَمْ
في وِلْجَـة الكـافْ غَـادِي
تُسْكُـنْ مْـرَادِي ...
ويَـا عْنَـادهَـا وْيَـا اعْنَادي
شْـرَكْ المحبَّـة سَـلْ... ڨَـلْـبي تِـعَـلّْ
دَخَلْت المَحبَّة طُفُـلْ..اِمْبَـاري الغِلّْ
واڨـفْ شاهِد عِـدِلْ ..صادڨ فحَلْ
بْنَـاتْ اللّي حبّـو يُوَلّـو
لا مَـا يذلُّـو..
وفي عڨـابْ لِيلِي يطلُّـو
شَركْ المَحبّة ضِيـمْ .. آهْ يَـا فْهيـمْ
ولّيت مِثْـل اليتيمْ .. مْرايِفْ ذْمِيمْ
ناصبْ عَ الوهْمْ كِيمْ.. وفاڨِد الرّيمْ
ويَـا ضِيعْتِي مَاضْيَعنِـي
حَبّيـتْ يَعـني..
وْنَاديتْ لا مِنْ سمَـعـنِي
الحلّاج الكافي .
