يُصعُـبْ حَـــالي ..
عَ اِللِّي هِبِـلْ اهْـبْـالْ مِثْـلْ اهْبَـالي
وعَ سَاهْـرَات اللّـيلْ في مِيجَـالِي
وعلى أمّْ حَارِڨْ في البْحَـرْ ضَنَاهَـا
وعَ كـلّ منْ شَـڨّْ الـبُـرُور وجَــالي
وعلى كُلّ فَـاهِمْ كِلْمِتِي ومَعنَـاهَـا
حَـالي يُصْـعُـبْ ..
اللـّه لا يعْـطِـيـك شَـيْ اِلْ يغـلِـبْ
عدّيتْ عُمري في الملاعب نلعَـبْ
لا غـدرتْ مَـرّة ولا كـذبت عـليهَـا
نهار اللّي ڨُتلكْْ يـا هْلَا يا مَرْحَـبْ
نـلْـڨى الڨُـلـوب مُـوَطّيَة عِينيـهــا
يُصعُـبْ بَرشَـه ..
عَلْ لّي مْثِيلي مَـا يطيڨُـو فَرْشَه
وعلْ لي تعلّـڨْ في الغرَڨْ بِڨَـشَّه
وَعَ يتِيمْ فَاڨِـد الوالِـدة ودفَاهَـا
وعلْ لِّي شَدّْ الشُّـوكْ شَدّْ الكَمْشه
وَعَ مِنْ ضيّـعْ سْفينْتُو ومَرْسَاهَا
يُصْعُـبْ يََـاسِـرْ...
عَ إلْلِّـي مْثِـيلِي بَـاعْ وهُـوَّ خَـاسِـرْ
وعَل ْمِنْ كتبْ بيمِينْ بِإيدْ العَاسِـرْ
وعللي حَـزنْ بَعْدْ الفَـرَح وزْهََـاهَـا
وعللّي حرڨ في بَحر مُوجُو كَاسِرْ
وعلى مِنْ ترَكْ عِيلَة بِلاشْ عْشَاهَا
يُصعُـبْ نِــزْهْ ...
عَ الْلّـي ڨَـعَـدْ وحِـيد يُـومْ الحَــزَّهْ
وعَ لَابْـسَـاتْ الجُـوتْ بَعْـدْ الخَـزَّهْ
وعلى رَهِيـنْ عِلّـة مَالْڨَـاشْ دَوَاهَا
وعَ رضِِيعَ يبْكِي عَ الصّدَر والمَـزّهْ
وع إِلْلّي بَنَـى بَـنْـيَـة وَمَـا عَـلّاهَـا
