ســجــال..

 الحلّاج الكافي :

و مِنْ عِـينُـو كَـبيرهْ

تِـذْهِبْ في اشْـوَارُو الشِّـيرَهْ

يُـنْـقصْ تَـدْبيــرهْ

و مَا يقبِلُّــو حَـدّْ شَـهَـادهْ

و إنْتِي يا دَادهْ ..

كالعادهْ ..

ماكشْ وَدّادَة

-----

الشّاعر محمّد مامي Mohamed Mami :

باللّه واعِيهْ ..

يا دادة زيدي وصّيه ..

ربّي يهديه ..

و قولي لَه الدّنيا غدّارة ..

اللّي يضحك ليه موش ضامن لمحبّة ليه ..

ممكن باغيه ..

يتدرجح زيّ الصّنّارة ... إذا واتت فيه ..

في السّوق يتباع خضارة ..

-----

الحلّاج الكافي:

نهار اِلّْ تتعدَّى ..

لا حديث ولا سلام ترُدّهْ

توْ عندي مُدّه ..

نعاني فِ الهجران وصَدَّه

طوّلتي الرِّدّه..

لا درينا ضَمَارْ ولا شِدَّه

يا حاجبْ وِدَّه ..

شوفْ عيبكْ زايِدْ في حَدَّه

يا نايِرْ خَدَّه..

نتعدّى سورك وِنْهِدَّه

ونحوز السِدّه

ونخلع بيبانكْ لابُدّه

ونحتلّْ أبراجه

ومثيل عجاجه

نقضي حاجاتي بالحاجه...