مقطع من نصّ..
حول المال والشعر
*********
سَاعـات نُـغْـلُبْ والـزّمـان غُـلُـوبي
وساعات نُدخل حَربْ نَطْحْ أكْبَاشْ
وساعَـاتَ نِـلبسْ لِـبْستي خـرُّوبـي
وساعــات نلبِـس الأبيـض اللّـلّاشْ*
وساعات نشهَـر حفلِـتي وطُـرُوبي
وندفَـع أموالي ومْـا نڨُـول اِلْـوَاشْ
ساعاتْ نحضر ونزيد من مَكْتُـوبي..
وُجُوهْ لحبَابْ ما تِشْتَرَى بُوبْـلاشْ
وساعـات لَـوْ عَـبَّـا المـال جُـيُـوبي..
ما نطيـڨْ نحضر مَجلس الأوْبَـاشْ
مانيشْ شاعِر فِ الفلُوس حُسُـوبي
ومَانيشْ في وسط الـزّرد مَشْمَـاش
ومـا كانْـشِي الدّينـار من مَطلـوبي
إذا مـدّلي الـجِيعـانْ مـا نـرضَـاشْ
مال الخسيسْ كالملح فيه عُـطُوبي
ما يجيشْ عطر الـعُـود مِ الأسْفَـاشْ
مـَال الكـريـم يـزيـد في مَــنْسُـوبي
ويُستُر عُيُوبْ اِلْ ما سَترها قُمَـاشْ
وما كنتْ شاعر فِ البلاط خُـطُـوبي
ولا نويتْ من شِعري اِنْدير اِمْعَـاشْ
ومـانيـشٰ ربّْ ولا كُـنـتْ رُبُـــوبِـي
ومَـانيش عَـبـٍد وخَـادِم الشُّــوّاشْ
انا الشِّعر عندي kif في مَشْـرُوبي
نشـربْ ونسقـي بعيـد عَ لَـغْشَـاشْْ
ولا كُنتْ فِ المَحفِلْ حزينْ كُـرُوبي
إذا حضـرتْ تحفـلْ زينـة الـنـوّاشْ**
وما كُنتْ نحسِبْ صراحتي فِعْـيُوبي
يَـا نڨُــول رايـي.. يَـا نهِـزّ اقْشــاشْ
شِـعـر الجمَــال غَـايـتي وِحـرُوبـي
يَرضَي حبيبي والـغِير ما يرضَـاشْ
ومِنْ كانْ شاعِر وفِ المَالْ رُغُـوبي
راهُو الطّمَع في الڨُـولْ ما يخْـفَـاشْ
وَجْهَـكْ حبيبـي فَرحَتي وِطُـيُــوبي
وإذا ِتـنـادي اِنْجــيـكْ عَ الارمَــاشْ
--------------------
* اللٌـلّاشْ: الناصع النظيف.
** الـنّـوّاشْ: قطعة حليّ تزين غرّة المرأة وشعرها.
---------------------
الحلّاج الكافي (م. ق. )
بن عروس في 4 فيفري 2022.
