عَامْ اِلْ مَضى ومَا فِيهْ بَاكُو حْلِيبْ...ولا فيهْ زِيتْ وبُـنّْ ولا سُكَّرْ
وعَامْ الِّي غَرڨنَا ومَا لڨِينَا سْبِيبْ..وْزَاد فَقْـرنا سْكِـنْ معَانَا وعَمَّـرْ
وعامْ الحُكُومة عَاضّة كِالذّيبْ.. ومَكَّـاسَهَـا يِنْهِـبْ فِينَـا ويُنْـطُـرْ
وعَامْ الّي بَحَثْنا وْمَا لڨينَا أدِيبْ.. يُوصِفْ حَالْ النَّاسْ والّا يُشْعُـرْ
وعَام الّي ردّ الشّعبْ هُـوَّ العِيبْ.. والكِـذب والبلُّـوط مِ المِتـخَـمّـرْ
وعام الّي فرحت دِرْتْ فيهْ حبيبْ..طَلعلي سِفْش ركِيكْ كِ بُوبَكّر
فِالوِجْهْ ترى تِرِيطِيبْ وتْسَلْهِيبْ.. وفي الڨِفَـا يكشّر نِيَابُو ويَغْـدَرْ
وعَامْ إلٌي زَرَعْنَا ومَا لْڨِينا نْصِيبْ .. اللّهْ لا يُـرُدُّو ويِمْشِـي يِـزَمَّـرْ
