نادى دير الكاف تعالى...

  

ما تقـولشْ لَا..لَا..

ما تڨـولش لَا ..لَا..

إذا دارو المحفل بكْماله

وحضروا الحفّالة

ونادى ديــر الكاف تعالى

---

ما تقولش تَـاعـبْ

اذا حبيبك قالّك نَـا راغـبْ

تحضر وتحـاربْ ..

وم اللّمة ما تكونش هـاربْ

الصّـادق بأقْـوالة 

يعـدّل وتعديلُـو مُـنقالـة 

ونادى ديــر الكاف تعالى

---

ما تقولش خلّي

تَـوّ غُدوة نرجــع ونـولّي 

وللكـرُبَـة جـلّي 

ياللّي في المُـرّات تحلّي

الدّمعة الهمّالة 

تخلّي في العينين اِسْمَالهْ

ونادى ديــر الكاف تعالى

---

ما تقولش يكفي 

نَا غِيابي كحضوري يعفي

لو عرفو ولفي 

ما يكٌـونوا إلّا من صفّي 

ما نحِـبّْ كْفالة 

نا وحدي وِيبَـة واعْـدَالة 

ونادى ديــر الكاف تعالى

ما تكونش بِرّي 

وما تسمعشْ كلام الذِّرّي 

عندكْ ما تَورّي

وعندك ما اتْعلْم وِتْقرّي

وما ثمّة بدالة

شاعر ما يقبلشْ اٌغْـلالة 

ونادى ديــر الكاف تعالى

لا تكون اِعـرَاضَة 

ولا تطلبْ ديّة ولا عَواضَة 

شِعركْ باغراضه 

يفيّع ماه على البيّاضة 

سحابُـو يِتْعَـالَى

تسمع رعـدو في جَمّـاله

ونادى ديــر الكاف تعـالى

الكـاف اللّي نَـادى ..

وقالّك احضـر كيفْ العـاده 

لا ثمّـه سَـاده ..

صَـاروا عوّاضيـنْ أولاده

من السّـرس أصَالهْ..

وانت ما تكُـونشْ مِنْ وَالـهْ
ونادى ديــر الكاف تعالى

للكاف تعنّى ..

وفي القصبة هيّا قابلنا 

نطلّو ع الجنّة 

وحوّاء تفّاح توكّلنا

واِللّي تحلالهْ ..

يصبّْ  شرابٌـو كالسّباله  

ونادى ديــر الكاف تعالى

(الحلّاج الكافي)