إذا زارنِـي المُــوتْ.. آشْ تِـدِيـري ..؟
وإنت إلْلي كنتٍ دافية فِ سريري
وانتِ اللّي كنتٍ مِـن البِعَـاد تِتٰكَـدٌرْ
وكٍ- تشـوفني بين البنـاتْ تِغِـيـري ..
إذا زارني الموتْ ..ٱشْ الْ يَـجْـرى
وانتِ اللّي كنتِ في جناني زَهره
وانت اللّي كنتِ كاسِية وما تَـعْـرَى
وانتٍ اللّي كنتِ تامـري وتْـشِيـري
(وكِ تشوفني وسط البناتْ تِغِيري)
إذا زارنــي المُــوتْ..آشْ تسَــاوي
وإنتِ اللّي ذڨْتي من اِيديّا شهَـاوي
وإنتِ اللّي ڨُلـتِ فِ الغياب نِـلَاوي
ويُحـرُمْ كُـحْلِي وحِـنّتي يا عْشيري
(ولا يذوڨْ غيركّ نِعْمِتِي وخْمِيـري)
إذا زارنـي الـمُـوتْ ..وَقتْ السٌاعَهْ
وقاضي الفَنَاءْ لا حَدّْ يلْوِي ذِراعَـهْ
وانتِ ڨُـلتِ صْعِـيبْ خَالِي اوْدَاعَهْ
وطريق الحزنْ ماهوش هوّ مسيري
(ويا موتْ ابعد على حبيبي وسِيري)
إذا زَارِنِـي المُـوتْ .. ومَــالُـو صَــدٌْ
والـمُـوت يِــزُور الـكُـلّ ... وَلَا بُـــدّ
يَـا هَـل تَـرى يَـبْـقَـى رْبَــاط الــوِدّْ
وإلّا يْجِيـكْ الشّـكّْ حَـتّى تـحِيـرِي
(وتڨُولي حُكُم المُوت .. فِي تَقدِيري)
إذا زارنِـي المُـوت على غفـلـة .. وانتِ اللّي كنتِ في حسابي طُفلة
نشوفكْ غزالة ترتعي في بروري.. ومثل الـڨمر يضوّي عليّا الحفلة
ونعمل مراسم عيد يوم حضورك.. ويتبدّل مذاڨَ المُرّْ يصبح عَسلَة
يا هل ترى تشتاقني في غيابي ..وتڨولي الحياة بعدكْ حبيبي تَخلَى
لا عاد وسط اللّيل نسمع صُوتك .. ولا عـاد يغلـڨ باب بيتي بقُفلَـة
بعدك رفيڨي سُـور بيتي مضّمن .. ونبقى حصينة وعالية كالنّخلـة
وإلّا نولّو في الڨـديم معَـارف .. وتنسي حديث الحبّ وسط المَخلة
وتهاجري تزوري جنينة جديدة .. وتدوري على الأزهار مثل النّحلَـة
ونهُـونْ كما هانتْ عليك العِشرة.. وتنسي هوايا وحُضوَتي وتدبيري
أذا زارني المُـوت آش تديري؟
_____
الحلّاج الكافي( م.ڨ.)
ليست هناك تعليقات:
إرسال تعليق