ريشة ...

 

ريــشــة

----------------------------

سِلْسَـة .. 

طربّة ..

خـفيفـة ..

مثلْ ريشْ حَـمامْ 

تكتـبْ مع لـقْـــلامْ ..

بـرْشَا حـروف ظريفة 

يا غامـقـة .. 

يا نحـيفة ..

تحمل معاني اللّون والأحلامْ

وترقص "فلامنكو" 

في سحنة وايــدْ رهيـفة 

وعَشيرهَـا  رسّـامْ

ريشة حـبارها ســــــاحْ

تُـرسم جبال مْـديـدة 

و تــزرع مع الفـــــلّاحْ

تصنعْ ظــلال النخــلْ 

والبحــر والألــــــواحْ

وتعـرّي نجـوم الليلْ

وتكشف صدى الأشبـــاحْ

وتعطي السـؤال تأويل 

وللخــمر والأقــداح

وقت الشّمـوع تسيـل

مع الـفـنّ والأفـــــراح  

ونغـمات "راستْ الذيل "

وشاعر  نثـر حروف كلّ صبـــاحْ

خـــــزامى...

 وعـطـر إكْـليـلْ

ورسم انبلـج  وسـط الظّـلام و لاحْ

من صوابعك "اِيــــدِيـــلْ"

وكنتِ .. العطر .. والفنّْ .. و القـزّاحْ

وحـبْـلٔ من محـبّـة طــوييييييييييلْ.

--------------

المهدي / الحلّاج الكافي ..

نصّ  قلته بمناسبة معرض الرسّامة الصديقة "ايديل" هذا المساء بالنادي  الثقافي الطّاهر الحدّاد ..المدينة العتيقة / العاصمة تونس (10 فيفري 2018).

صَـوابع...

وِصَوابِـع مِثـلْ البِسِـرْ

تِهِـزّ الـنّظـرْ

انتَ تشـوفْ يا عْمُـرْ

انْضرّيت ضَـرّْ

ورجعـتْ خـديم شُوشَـانْ

من بعد ما كُـنت حُـر ْ

امشي مرسول واخـزرْ

تراها كما وردة السرّ

في العطـر تنثـر

وكما جنينة الفّـلٌْ

بعد المطـرْ

وجِيـبْ الخبَـرْ

ومنْ بعـد غُـضّ النّظـرْ

لا تمُـوت مضروبْ في الغِـرْ

و تدخُـل ڨـبـرْ ْ

وعليكْ تڨُــومْ النّـوايـحْ .....

و بحـرْ الهـوى ليه سايـحْ

غّـادي و رايـحْ

.

صوابـع مثيلْ رخام مَرْمَرْ

من صنع نحّـات رومان..

 يعرف يحَكّـرْ..

يتحّـف يسطّـرْ..

مغروم بالنّحت 

ع صنعتو يِبَات يسهـرْ..

يقلِّم يشحّـر..

على أطرافها يبانْ 

مَرجَـانْ أحمَـرْ

اللّه يستُــرْ..

عِلْجَاتْ بِيضَاتْ

عَ البَـالْ تُخْطُـرْ

يبانْ ضَـوّْ بينْ لَصبَـاع

نُـور امْنـوّرْ

وخاتـم معـدن نْبِيـلْ

بالقَـبُـوْ أخْـضَـر 

وخطوط في الكفّ تصوابْ

تنزيل محضر

بلون السكٌـر

ويا غِـبْنَتِي راجل اكبيـر 

وفي العقـل يُصغر

انا اصبحت في النّاسْ طمّاع 

والـرّبْ  يغفـرْ...

استعوذت من غيّ شيطـان 

يغيبْ ويحضـر

من شافهُـمْ يا فْـلانْ 

صلّى وكَبّـرْ

وتابْ ولْبـسْ جُبّـة الـزّهْـد

وماعَـاد يكْـفـرْ..

ويتُوبْ تُوبَـة انْصُوحة

ويقْرَا اللُّـوحة

ويتهجّـد اللّيل حتّى اصبُوحَة

نادى دير الكاف تعالى..

 ما تقولشْ لَا..لَا..

إذا دارو المحفل بكْماله

وحضروا الحفّالة

ونادى دير الكاف تعالى

---

ما تقولش تَـاعـبْ

اذا حبيبك قالّك نَـا راغـبْ

تحضر وتحـاربْ ..

وم اللّمة ما تكونش هـاربْ

الصّـادق بأقْـوالة 

يعـدّل وتعديلُـو مُـنقالـة 

---

ما تقولش خلّي

توّ غدوة نرجــع ونـولّي 

وللكرُبَـة جـلّي 

ياللّي في المُـرّات تحَلّي

الدّمعة الهمّالة 

تخَلّي في العِينين اِسْمَـالهْ

---

ما تڨُـولش يكفي 

نَا غِيابي كحضوري يعفي

لو عرفو ولفي 

ما يكونو إلّا من صفّي 

ما نحبّْ كْفَـالة 

نا وحدي وِيبَة واعْدَالة 

ما تكونشْ بِـرّي 

وما تسمعـشْ كلام الـذِّرّي 

عندكْ ما تَورّي

وعندك ما اتْعلْم وِتْقـرّي

وما ثمّة بْـدالة

شاعر ما يقبلـشْ اُغْـلالة 

لا تكون اِعْـراضَة 

ولا تُطلب ديّة ولا عَـواضَة 

شعركْ باغراضه 

يفيّع مَـاه على البيّاضة 

سحابو يِتْعَالَى

تسمَـع رَعْـدُو في جمّـاله

الكـاف اللّي نادى ..

وڨـالّك احضر كيفْ العَـاده 

لا ثمّه ساده ..

صاروا عوّاضين أولاده

من السّرس أصالهْ..

وانت ما تكُونشْ مِنْ وَالـهْ

للكاف تعنَّى ..

وفي القصبة هيّا ڨَابلنا 

نطلّو ع الجنّة 

وحَـوّاء تفّـاح توكّلنا

واِللّي تحـلالهْ ..

يصبّْ  شرابو كالسّبَـاله  

(الحلّاج الكافي،) م.ق.  ..

ساعات نُغلُبْ.. والزمان غُلُوبي.

 

مقطـع من نـصّ.. 

حول المال والشّعر

*********

سَاعـات نُـغْـلُبْ والـزّمـان غُـلُـوبي 

وساعات نُدخل حَربْ نَطْحْ أكْبَاشْ

وساعَـاتَ نِـلبسْ لِـبْستي خَـرُّوبـي

وساعــات نلبِـس الأبيـض اللّـلّاشْ*

وساعات نشهَـر حفلِـتي وطُـرُوبي

وندفَـع أموالي ومْـا نڨُـول اِلْـواش

ساعاتْ نحضر ونزيد من مَكْتُوبي.. 

 وُجُوهْ لحبَابْ ما تِشْتَرَى بُوبْـلاشْ

وساعـات لَـوْ عَـبَّـا المـال جُـيُـوبي..

ما نطيـڨْ نحضر مَجلس الأوْبَـاشْ

مانيشْ شاعر فِ الفلوس حُسُوبي

وما نيشْ في وسط الزّرد مَشْمَاش

ومـا كانْـشي الدّينـار من مطلـوبي

إذا مـدّلي الـجِيعـانْ مـا نـرضَـاشْ

مال الخسيس كالملح فيه عُطُوبي

ما يجيشْ عطر من جُرّة الاسْفاش

مـَال الكـريـم يزيـد في مَـنْسُـوبي

ويُستُر عُيُوبْ اِلْ ما سَترها قُماشْ

وما كنتْ شاعر فِ البلاط خُطُـوبي

ولا نويتْ من شِعري اِنْدير اِمْعَـاشْ

انا الشِّعر عندي kif في مَشْـرُوبي

نشـربْ ونسقـي بعيـد عَ لَـغْشَـاشْْ

ولا كُنتْ فِ المَحفِلْ حزينْ كُرُوبي

إذا حضـرتْ تحفـلْ زينـة الـنـوّاشْ**

وما كُنتْ نحسِبْ صراحتي فِعْيُوبي

يَـا نڨُــول رايـي.. يَـا نهِـزّ اقْشــاشْ

شِـعـر الجمَــال غَـايتي وِحـرُوبـي

يَرضَي حبيبي والـغِير ما يرضَـاشْ

ومِنْ كانْ شاعِر وفِ المَالْ رُغُـوبي

راهُو الطّمَع في الڨُولْ ما يخفَـاشْ

وَجْهَـكْ حبيبـي فَرحَتي وِطُـيُـوبي

وإذا تنـادي اِنْجـيـكْ عَ الارمَــاشْ

--------------------

 * اللٌـلاشْ: الناصع النظيف.

** الـنّـوّاشْ: قطعة حليّ تزين غرّة المرأة وشعرها.

---------------------

الحلّاج الكافي (م. ق. )

بن عروس في 4 فيفري 2022.

ممحونْ...

(1)

مَمْحُـــونْ..

بالشّــعر مَسْكُـــونْ ...

بالحبّ مجنُـونْ ..

عِشقي افـنُـونْ ..

دافي سخُـــــونْ

مْثِيلْ جَمـــــرْ 

في وِسْطْ كانُـــــونْ

تڨُـول صيف رامي غْطايَا

 نملكْْ.. نْصُــــــونْ..

ونرفعّ السّيفْ مسْنُــونْ

وفي الحُكــمْ،

ولّيـتْ هَـــــــــارونْ

قصــري عالي السّرايا

اللِّي عشقتها ..

 ما تقــدرْ تخُـــونْ

شهْلة عُيُـــــــــــــون

والفمّ كما تبْر متقُـون ْ

كالنّــور صافية اِمْــرايا 

صبَّـاحة اللّيل قرعُونْ..*

سهّــارة صُبْحهَـا معايَــا 

في العرض ما كانت تهُـــــونْ .. 

لو جابوا مال قارون

ْنسْفرْ في بحْرْ مَسْكُـونْ 

 بقُرصَـانْ بالڨتلْ مكْنُـونْْ 

في المُـوجْ كاســرْ نِهـايَـا

 نشقّو كما رصاص مََقْـرُوْنْ*

وفي بَحْرِكْ تسمّيتْ "حَنُّـونْ"*

و بشباككْ ناسـجْ غِنـايَـا ...

اللّى سمعـني قال ملحُـونْ

وحبَـــاري دمـع الصّــبايّـا..

نَـا غرست في الأرض زيتُـونْ

وبْنِيت بَـرشـة حنَـايَـا

ودفعت في المَـهْـر مليُـونْ 

حتّى نِلْـت الرَّضَايَـا

من غَــار لا يباتْ في شُـونْ

ولا يعّــرف ســرّْ الـغِـوايَــا

---------

* قرعون : في الاحمر كشقائق النّعمان

* مقْرونْ: بندقيّة ذات طلقتين ناريتين او أكثر.

* حنّون : Hannon بحّار مشهور وملك قرطاجي وقائد عسكري ومستكشف بِحار ...

الحلاّج الكافي .. 

سفر ...

أسافـرُ وَحْــدِي ..

بلا مَــــاءٍ ..

ولا رَاحلَــة ..

أو مَعِيــــن ..

مَــا زادي إلّا ..

حنيـنٌ يـؤثّث روحـي 

وأثـرُ أناملها على حاجبَيّْ 

وما قـالته ذات صبَـاحٍ 

على خـدّ باب الــوداع :

يا مُـتْعِِـبي بالمــزاج الذي لا يـدُومْ

أراهِـنُ على ضـرْبة حـظّ جـديـدة 

 لِـتَعُـودَ سليــمْ ..

فسِــرْ الى حـتْفِــكَ سَالِمََا 

أيّها الرّجُـلُ الذي لا يُـقِيـمْ ..

---------------------------------------------------

الحلاّج الكافي ( م. ق.). 

ثمّه برشا أوجـاع..

 

ثمّة بـرْشا أوْجـاع مَا تـتْـخـَـبَّـى

سكنتْ بين القـلب و الحَـشَـاشَـا

ومثلي موْجُوعينْ.. مَالـقـُو طُـبَّـا

و يَامَـا أهل غَـدير مَاتُو عَـطاشَا

ومِِمْـلي  دلْـوْ الـصبّـر  زادْ تَـعـبّى 

و فاض عليّا الدّمـع هذا اِرْشَاشَـا

شُفـتْ ذَريرْ الـــرّمْل يعْـمل قُـبَّـه

و يرْدمْ بيـرْ السَّـقْيْ  و الفــتَّــاشَا

وخَدشْ الرّوح مْهِينْ يصبح حَبَّـا

كَــدّر حـال البـالٌ زاد غْــواشَـا

مَـانِـيشي مَــملْـوكْ عندـ الــــرِّبّا

ومانِـيشي قارصونْ خادِمْ بَـاشـا

نَـا اصلي معـروف باهي الـنَّـبّة 

ومانيشي رذّال حاشَـا وحاشَـا  

بَـابَـا سْـبِـع الـغَـاب وامّـي لَـبَّـة 

وْأنَـا شِبـلْ تخَـافْني الهَنْتـاشَـة..

------

المهدي ق. (الحلّاج).