سايس ع قلبي

جَايِرْ حُبّكْ فَاتْ حدُودَهْ..يا سِمْحَة لَوْصَافْ غْـزالْ متَعّبْنِي بِشْرُودَهْ ..سَـاكِنْ بَـرّْ الكَـافْ يِعَانِد ومْكَثٌر في عنُـودَهْ..لا يحَكّـر لا يَرَافْ لَحظِكْ كِالْحَربة المَغْمُودَهْ.. بِالشْفْرَة نَسٌَـافْ تعّبني ڨرعُونْ خْدودهْ.. وْنَـا ڨلبي شفّاف .......

سايس ع ڨلبي ..

بالله سايس ع ڨلبي

سَايسْ عَ قلبي.. نَا قلبي فخّار الطّينة

سايح بيه شقف سفينة لا يحمل غلّْ ولا ضغينة ولا يعرف يجحد لا يخبّي..

بالله سايسْ ع قلبي.

سايس ع ڨلبي

نا ڨلبي ملفوف حرير

أخضر مثل أعشاب غدير

وين تروحي يحبّ يطيرْ

ويضحك ما يعرفش الكُبّي

بالله سايس ع قلبي ..

سَـايـسْ عَ ڨلـبـي ..

بالله سَايسْ عَ ڨلبي.

نا ڨلبي حُوضْ النّعناعْ

وينْ تغرِسْ ديمَا نفّاعْ

صافي كبيرْ وْمالُو رْدَاعْ

فرّغْـتُو وَصْبَحْ مَعَـبِّي..

بالله سايسْ عَ ڨلبي..

سايس ع ڨلبي..

نَـا قلبي مَرْكبْ في المـينة

شـابِكْ في المرساة رهـينة

لا فرح لا دار الزّينَة

يسْرحْ وقت إلْ إنت تحـبّي

باللّه سايـسْ ع قلـبـي.

سايس ع ڨلبي

نا ڨلبي مراية وبلاّرة

سرّو ديمة هوّ جْهَاره

هامل ما يعرفش دبارة

والحبّ يجرجر ويدربي

بالله سايس ع ڨلبي..

سايس ع ڨلبي

ننَا ڨلبي تايه في غَيّة

كلما ما عشق يڨول شويّة

يمشى كما تڨولي بالنّية

طايع وع دينك متربّي

الله سايس ع ڨلبي.

17 février 2021

 

 · 

Partagé avec Moi uniquement