أرق رمضاني ..

 قال صديقي الشّاعر محمّد مامي Mohamed Mami في أرق المحبّين  ما يلي :

عادي كِي نسْهر في الظّلمة    ***  طـار نومي و لا حـبّ يجِـيـنـي

نـدْعِـي نـسْـتـنَّـى فـي رَحْـمَـة  ***  باشْ نـهْـدى و نْغـمِّض عيني

والَـعْ نـسْـتـنَّـى فـي خِـلْـمــــة  ***   في أحْـضَانِـكْ لَـلَّــة صُـمِّـينِي

تـرْوِيـنِي و تـعْـطِـينِي كِـلْـمَـة  ***  من بَـالِـكْ لا  عَـادْ تـنْـسِـيـنِــي

وأجبته في سياق وعود الحبيبة الكاذبة:

عَادي كِ إنّادي وما تجَاوِبْ .. أصلْ العِشْـڨ بكُلُّو غْرايِبْ

 يامَا وعِدتي وبعد خْلَفْتِي .. وْنَا شاعر ما نَرضَى نْعَـايِبْ

ڨلـبْ الشّاعِر ماهُـو دليلُـو ..  يِكْـذِبْ كِ يـڨُـلّكْ نَـا تَـايِبْ

وياللي كِذبْتي مَرّة ومَرّة ...  وْزِدتِي عَ لجْـراح عطَـايِبْ

بَرشة غيرك قالوا تعَـالى..   وَاخْطَاك مِ الْ طبعُو خَايِـبْ

نِحنَا غَرسِكْ ونِحنَا زَرعِكْ .. وأنتَ مخلّي زرعكْ سَايبْ

الحلّاج الكافي ..

وفي نفس السياق أجابني الصديق الشّاعر محمّد مامي :

عمري عقب اشْ ما زال...عرفنا الباهي باللٌي فيهْ

اللي عشقتو جاء عالبال.. نغمض عيني نحلم بيه

نظمت و غنيت الموال...  و في شعري نتغزل بيه

و قلبي مكوي ع الملال.....حبيبي ما  نقد نسميه

هاني جيتك يا رمال .... حلمي فسر لي معانيه 

يا حلاج كون الحلال... تخاف نموت و ما نلاقيه

اذا واتت سبقوا الاجال.........هزّ وصيّة منٌي ليهْ

أمشي قل لو مامي قال ...تجيني لقبري تقرا عليه

نرضى يسقوني القتال... و يصعب نعيش بلا بيه

واجبتُ صديقي الشاعر محمّد مامي:

يطُولْ عُمرك ديمة فِالْخِيرْ ..  وْتبقى عَ المِنْوالْ تسيرْ

يا "مَامِي" راو ڨلبك أخضر .. وحشيشك نابِت فِ غْديرْ

مكتُوبْ على الشّاعر يَعشَـڨْ.. ويعـذّبْ ڨَـلْبُـو لِـكْبِـيـرْ 

ومكتوبْ أوجاعُو تتكاثر.. يجحدها  ويردمْ في بِـيرْ

وْمٍثلكْ يَامَا سهرت اللّيل .. حتٌى تشمَّت فِيّـا الغِـيـرْ

وْمِثْلكْ بِـتّ نعـدّ انجُـومْ .. وحدي فِ دبَادِيبْ الدّيـرْ  

صَابِـر نِتـودّد للـسّمْـرة ..     لـعَـلّ تجَـاوب وتشِـيـرْ

ويا "مامي" هاني نِستنّى ..خَايفْ ڨَبْري يُوَلّي سْرِير

واجاب الشّاعر محمد مامي :

في دنيتنا أحنا ضيوف .... و الخلقة تخاف الهبلة

و يا حلاج الشْاعر معروف كي يزرع يختار الشّتلة 

يختار يثبت و يشوفْ..و لا يحفر ساسو في رملة

و ديما يبعد ع الهفهوف...و لا يرضى عيشة مذلّة

و من يأكل لحم الحلوف.....ثابت خروجو م الملّة

و اللي عكستو الظروف.يموت شهيد يا شرع الله

في سريرك سايس و طوف.فحّجْ و سمّي بِسْمللّه

واجبته في صباح الغد بعدما اخذ مني النوم ..

مِنْ يِـمْلـكْ الشّعـر وفَنّـهْ ... يُدخُلْ يِتنَعّـمْ في الجَنّـة 

نِحنَا صَنعنَا افْرَاح الجِيرَة.. ولا غْـدرنا حَـدّ ولا خُـنًـا

ولا امْدَحنا مْنَادِبْ الشّيعَة..ولا نْصَرنا تَرَهْدِينْ السُّنّة

نِحنَا صَنعنا حيَاةْ جْديدة .. حُسْن اللَّمّة وبَاهِي الغُنّة

وبعِدنَا على ذْنُوبْ كْثِيرة .. منها الغِيبَة ومنهَا العَـنَّـة

ونحنا شِلنَا احمَالْ كْبِيرة ..فَاضْ السّيلْ ودِرنَا الـوَنَّة

ترَفّعنَـا على كـلّ رذِيلَـة ..  نْـهَـار الحَـاجة ڨُـلنَـا عَـنَّـا

وسْعِـدنَا غِـزلان صبَايَـا ..  يُـوم الفَـرح دَفَعنَـا الحِنّة

وِسْتَرنَا عُرُوضَات وْلَايَا ..  وفسّخْنا الشَكَّـة والظَنّـة

ويا مَامِي الصّادق فِكْلامِكْ .. نَا ضامِنْ إسٰعِد وتهَنّى

بحُـور الشّعر اللّي عُمنَاهَا .. تَشفَـع فِينَا بِلاشِي مَـنَّـة

سي بوبكر ..

 مشهد رمضاني ثالث (3):

شهاوي رمضان والسّحر والدوّارة ..

نهار جِمْعَة ع الصّبْحَة مْبَكّرْ..  هابط للـمَرْشي بشكـارة 

وفي العُصبانْ قعدتْ نفكّرْ ..  قلت عَشاـيا لِـيه ادْبَــارة

ناديتْ على "سي بوبكر"* ..  قُـتلـو هايْ نشروا دوّارة

قالّي اخطاني.. لا نكفـرْ ..    ماك تعرف مرتي سحّارة

والـدوّارة  منها  نُنـفـر ..    من يوم اِلْ وصّتني الجــارة

 قتلو امّـالا افرح وابشرْ ..    مَـرتكْ ماهـيشي مشــرارة

غير  انت مرمضنْ وتزمّرْ .. ودايِر في روحـك حُوبـارة

توّة ولّتْ مرتكْ تسحرْ ؟..   ولفعى ومشومة ومغيــارة ؟

يا قفري يا عيفْ المنظرْ ..  كِ خذاتك عرفتْ لـخْسَــارة

موشْ كنت تودّد وتْبَشْتِرْ .. ودموعِـك ع الـخـدّ حيـــارة ؟

باش تراكْ بعين وتُخزرْ .. وتضحكلك ضحكة مســرارة

وتمشي بجنبها وتتبخترْ .. ويـنْ تُعـرض  تهـدي  نــوّارة

اجبد مصروفك يا امقفّـرْ .. واصرف، ولا توصل لِبْذارة

يجيك نهار تموت وتَصْدَرْ.. وعيبْ الميتْ كثيرْ اعــوارَه.

رمضان 2021.

*طبعا كل تشابه في الأسماء مقصود .

الحلّاج الكافي.

_________

وفي موضوع الدوّارة والسّحر وشهاوي رمضان  أضاف صديقي الشاعر محمد مامي Mohamed Mami  تجربته في السياق قائلا :

نَايا لا نْبِـلّ و لا نْـعِـلّ *** نْعاني في النّـفْـس الأمّـارة  

مسْتانِسْ نمشي في الظلّ *** و عُمْري لا نعْمِلْ حُوبارَة

 عاشق ما عاد عنْدي عْقَلْ *** سِلْبَاتُو العُـودة المسرارة

 في حْظُوظْها نمشي لا نْكِـلّ *** خاضع لآحْكـام لُـوزارة 

 خلّتْني نْدَهْدِص لا نْدِلّ ***      مرّة شْرِيتِلْهَا دَوَّارة 

 و قُلْتِلْها يا زين الطّلّ *** اللّيلة نْغَنُّوا عَ الجَّرْجَارَة 

أنت ريقك سكّر و عْسلْ *** سحْرِتْني لَعْيُون حْبَارَة 

قالت لي غير كُولِ الْكُلّ *** و ما تْخَلّي فيها أمَارَة 

نا نُرْبُطْ و أنت اللّي تْحِلّ *** فالي ما تْجيبُو الصّبَّارة 

خُوكُم نِزْرِبْ بْلَعْاِ التّـلّ *** العُصْبانَة ما فيها مْرارة

 اليوم نرقصْ إذا ضْرَبْ طْبَلْ*** نْحَجِّلْ بِمْحَارِمْ ف الحارة

 عِرْيان و حافي الرْجِلْ *** يا كافي سلّفْني شْكارة 

النّاس يقُولُوا شْبِيهِ هْبِلْ *** تُظْهُرْشِ مَرْتُو سَحَّـارة 

واللّي ما يحِبِّشْ يِتْبَلّ *** ما يُقْعٌدْ تحْت الشّرْشارة 

واللّي يحبّ يحُوز الْكُلّ *** في الْمَرْشِي يِتْبَاعِ خْضارة 

يُصْعُبْ نَا نَرْضَى بالذّلّ ***نطلّقْها و ما نْقُولِ خْسَـارة

نعدّيه عوَيّم في الظّـــلّ *** و بعْد الرّبْطِيّة كفَّـــــارة

رمضان 2021.

محمّد مامي

يا فاطمة ...

  

غـُــــربَـة

----------

يا فاطمة نا زُرتْ بــرْشَــا مُـدُنْ..

مُـدُنْ كــالحة ما تحسّْ فيها حِـنّْ

ويا فاطمة حُيُوطْ المُدنْ ما أبْردْهَا..

لا فَـرشْ دافي ولا حنينة تـزُنّْ

ولا كلبْ ينبح لا رَحَى لا خْــلالة

لا ضْـرَعْ مالي لا شكاوي لبَـــنْ

ويا فاطمة طُلّي على رتْـعـتْـنّـا ..

وزيد ضَمّني الفـرسْ بِـالـرَّصـنّْ

ووصّيهّـا لا تلحقْ على جُـرّتنا..

لحْـم المدينة حمِير وإلّا حُـصُـنّْ

ويا فاطمة تلاقتْ مدينة وغُربة ..

ولحْم الغَـريب إذا بِـعِـدْ انْـتِـنّْ

ويا فاطمة لحْـم الغـريبْ تغرّبْ ..

واسْتَخْسـرُوا الڨبــرْ والكـفـنّْ

ويا فَـاطمة نَا جـارتي "صليحة"..

"الغُـربـة فَـنتْهَـا" ولا نَفَــعْ الفــنّْ

و لا "نجعْ سَاڨ" ولا تَِبعْ "بَكْرتها"..

ولا "خيلْ سالمْ" عَـارفة الوطـــنْ

ويا فاطمة إذا جُوكْ وسألو عليّا..

وشاعتْ أخباري بينْ شَكّْ وظنّْ

وجارُو عليّا نَـاسْ كانُو أحبابي..

وفتحُو جُرحي لِينْ بَـانْ ثَخِــــنْ

قُُـوليلَهُمْ تغرّبْ وعاشِرْ غُـربة..

ويا غُربتُو كُوني عسَلْ وسَمَنْ

وكلّ المُــدُنْ الصّاخبة حَبٌاتُــو..

وكلّْ منْ يرَاهْ يقُـولْ ضَاعْ وجَـنّْ

 يُـصعب عليه يعود لأرض انْفاتو

وصدّتْ عَـليه البابْ حتّى اذْعِـن

ويَـا فـاطمة نَـا غُـربتي دفْـنـتـني 

وما عرفت منهُـو حفَـر وإلّا دِفِـن

ويا فَـاطمة يهْـديـك لا تـلحَـقْــني 

إنتِي طــريّة وما تِطيـــڨي ارْزَنْ

وِانتي الطِّيبَة بضحكتكْ ودموعك

وْنـايَـا الصّـافي وْمَـا نْطيـڨْ خَـوَنْ

_________

المهدي / الحلّاج الكافي.

------

اشارات :

*صليحة : فنّانة شهيرة من دشرة نبّر من جهة الكاف سكنت العاصمة وماتت فيها.

* الغربة فنتها : اشارة الى اغنية صليحة " في الغربة فناني عمري راح .."

* نجع ساڨ : اشارة الى أغنية صليحة ، ســاڨ نجْعك ســاڨ ...

* بكْرتَها: اشارة الى أغنية صليحة "نا بكرتي شردت مع العزّابة " ..

*خيل سالم: اشارة الى أغنية صليحة المعروفة ب " ياخيل سالم باش روّحتولي" ..

------

الحلّاج الكافي ..

تونس في 15 نوفمبر 2018