شفتـــــــوش مُـــــواطن علمــــــاني وما فيبالــــوش بروحو لأنه وُلِدَ على السّـليقة والفِـطرة مُحبّا للمرح والفنّ والحيـــاة ويشرب البيـــــرّة كل رأس شهر وقت يصبّو الشهرية (المرتّب) ويعمل سكرة حتى يرى الدّيك حمارا ويحبّ الفنّان الشعبي "اسماعيل الحطاب" وامّ كلثوم وصليحة و احمد حمزة وساعات يدورها ويسمع "جاك برال" او "ايديث بياف" وبعض طلعات الجاز الرّهيبة "للويس أرميسترونغ" أو لجنّ البلـوز "فرانك سيناترا" ولما يبلغ نشوة الخمــر يسمع محمد عبد الوهاب ، ويحلف بالحرام كلّ ما يتغششْ ويغضب ويتعاراك مع اصحابو ويـدفع شويّة من فلوسو رغم الفقـر في الطّهور والعرس والموت ويموت على السّـلاطة مشوية و كعبة عـضم (بيض) مقليّة في الصيف وعلى كسكسي زردة (وليمة) سيدي عبد القادر وسيدي عمر البقراوي و يتفـرّج في الفريق القومي و يسبّ الملاعبية المتهاونين والمدرّب الجشع وكان لزم وزير الرياضة ويروح في الكار الصفراء ضاربو بوسفـــير من الدز ّ والفزّ وعندو ورقة الماء و الضوّ موش خالصة و كـرّاي وولدو وبنتو يكسرولو راسو على عُـومة في البحر صيفـا وعلوش في العيد الكبير، ولما يتعب من الصيام يفطر نهارات في رمضان ويدفع 5 دينارات بين قهوة وكاس ماء بارد المهم أن يكون المكان بعيدا عن عيون الرقيب ومنافقي شهـر رمضان المحترفين وعندو مرايات نظر ما بدّلهاش عندو سنين رغم أن الطبيب قال له ارجعلي كل 6 أشهر ويكره الترجي و الحكومة و مفتي الجمهورية وعرفو في الخدمة ويحبّ نومة على فردة البنك في الدار وك يروح يرمي الفيستة في بلاد و الصبّاط في بلاد و الكلاسط في الكولوار ويحكي مع اولادو على أساس أنه أكبر واحد في العالم منظّم في حياتو ..
شفتوش واحد مثل هذا الشخص فجّر روحو انتقاما من الطاغوت ورغبة في متعة جنسية مع حوريات الجنّة وسكرة حلال مع الخلفاء الراشدين وصحابة رسول الله ؟
الحلّاج الكافي / المهدي القاطري
___________
___________
ليست هناك تعليقات:
إرسال تعليق