منْ دونكْ يتْشَغْشبْ بَالي
و يسَخِّفْ حَالي
تڨُـولْ يتيمْ بَـلاَشْ امَّْالي
---
تُـڨـُول يتيـمْ بَلاشْ حَنِينَـة
لا عِندُو عَـمّة لا خَـالْ
زادْ فْـلِسْ ڨـعَـدْ رهِـينَـة
لا وَارثْْ لا عنْدو مَالْ
ڨـاعِـدْ هَـايمْ في ترْكينَـة
حِمْلو ما ڨـدْروهْ جْمَالْ
يتذّبِلْ و الحالة ضنينـة
يسمع ف للّي ما يتْـڨَالْ
شراعو مكسّر مثل سفينة
لا شبْكة لا خيــط حبال
معزولْ بعيدْ عَلى المِيـنَا
لا حَـــدّْ سَــأل لا قَـــــال
متضعْضَعْ عايش فِ غْبينَة
يمشي فوق الأرض خيالْ
و لا من دفّـاهْ بتحْضينة
و لا منْ هَـزّ معَاهْ أحْمَالْ
قلْ لي يا طُفْلة و اخْطينَا
و جاوبْ يا عينْ الجفّالْ
و قتاشْ الـرّيح يُــواتينا
و نعيشُـو خَالة مع خَــالْ
لا حاسدْ يتْشمِّتْ فِـينَــا
نتْـلاقُـو نجْمة مع هَــلالْ
و يتْسَلّكْ صُوفي يسَـدّينَـا
غطانا يولّي دَقّ خَـــلاَلْ
و نمشو لفْـراشْ يغَـطّينا
حتّى مُـوشْ فراشْ حَـلالْ
يَـغْـفـرلي العَـالي
و يمْسَحْ زلّاتي و أفْعَـــالي
نَـايَـا و أمْثــالي
إِللّي حَـرْثوا في الشّعْـر اقْـدَالي
و من دونك يستشغْشبْ بالي
و يسخّفْ حَـالي..
تـقُولْ يتيـمْ بَـلاش امَّـــالي
الحلّاج الكافي (المهدي القاطري) .
تونس في جانفي 2018
ليست هناك تعليقات:
إرسال تعليق