قـسـوة جــديدة

 قَـسْــوَة جْــدِيـدَة

--------------

ڨُلتِي ما تَنَجّْمْشي تَـنْسَى

مُمكنْ انتَ تَـقْدَر تَـقْسَى

لكنْ.. مَتْنجَّمْشي تَـنْسَى ..

هَاني نسيتَـكْ ...

رغم اللّي غْلَطتْ وحبّيتـكْ

نهَـار اِلْ ريتَكْ ..

حلّيت الڨَلب وْخبّيتكْ

وزدتْ اسْقيتكْ

أنا سقيتَكْ ..

وحطّيتكْ في محبسْ بيتَكْ

وعلّڨْتكْ وسْط الشبّاكْ

عِيني تَـراكْ ..

وردة حمْـرَا

يا ما ابهــاكْ

شيْ يهبّلْ

عين إلْ حِسْدَاتكْ تتخبّلْ

وين تقبّلِْ..

تَـلْقى حاجبْ و رمْشْ مّذبّلْ

موشْ أنَا اللي ڨُـتْلكْ تُڨتلْ ؟

نْهَار المَحفَـلْ..

نْهَـار اللّي حَبُّـوني نَغْـفِـلْ..

وِالاّ نُشرُبْ كاسِي و نُزُطُـلْ

هُمَّـا لْـڨُـوني شَمْـعَـة تِشْعِـلْ وسْـطْ المَـدخَـلْ .. تِـضَـوّي مْقَـامِـكْْ.. تُسْتُـر شَهْـوَاتِكْ وِغْـرامِـكْْ وْبَـعد الـغَـفْـوَة .. وْبَـعْد اللّي غَـرّاتِـكْ شَـهْـوَة وْبَـعد اللّي خَيَّـرتي الجَـفْـوَة اليُـومْ أنَـا تعَلّـمْـت الـنَّسْـوَة وْبَـرشَـا قَـسْـوَة وْهَـاني نْـسِيتَـكْ وْهَـانِي سَـافِـرت وْخَـلّيتَـكْْ.. بِـلَاشْ وْدَاعْ.. لا نَـادم لانِي مُلْـتَـاعْ لا متْـأسٌف علّي فَـاتْ ولا على حُبّ تَـعَـاشْ ومَـاتْ ولَا على عُمري الْ مِنِّي ضَـاعْ

وهكة نعيش ..

بقسوة جديدة

لَا نَحكِيها بِينْ أصحَـابِي

وْلَا نُنْشُرهَا عَ الجَـريدَة

لَا نِتبَهَـذَلْ ..

لَا نِـدّرْوَلْ ..

ڨَلبي بَـاااارِد وَلَّى جْلِيـدَة.. ---------------

الحـلاّج الكـافي (م.ق.).

تـونس 2014.

185