الفنان .. ثلاثية مع المرحوم ابو امين البجاوي والشاعر محمد مامي .

حكاية قلب .....رحلة فنّان

طال صبرو و ما تحمّلش حيرة الدنيا وما فيها

و ممكن قلبو ما نجّمش فارقها و بعد عليها

يا سرب الحمام الّ عدّى بالله ريتوش حمامي

فارقني و غايب من مدّة و خيالو عايش في احلامي

عشرة عمر و ما ناسيها

كان الطير فوق اغصانو يونسني بصوتو و تغريدو

ونحسّ الفرحة في الحانو و كاتم في صدرو تنهيدو

وفي قلبو آلاهة مخبّيها

في انغامو رقّة و إحسآس والكلمة في اللّحن إطيعو

و اللّي صنع ربيع النّاس ما كمّلش ايّام ربيعو

رحلة فنّان و نحكيها

أبو أمين البجاوي ..

 الفنّان ..

 هكّاكّا* يعيشْ الفنّانْ    .. بين الكلمة والألحانْ

يسقي في البَسمة يربّيها.. وقلبو كُتلة مِ الأحزانْ

مرّة يكتبْ كلمة حزينة .. ويمسحها بدمعة عينيهْ

يخبّيها وسط التّدوينة .. ويسجّلها لا تغيبْ عليهْ

                الكلمة قطعة مِ الأبدانْ

                 هكّاكة يعيش الفنّان

ومرّة يكتبْ كلمة حِلْوَة .. باشْ يفرهدْ بيها النّاسْ

ويعالجها، تصبح غِنْوَة .. تولّي كَمْيَة معاها كاسْ

                 ويكسي من قلبو العريانْ 

                    هكّاكة يعيش الفنّانْ 

يكتبْ باش النّاس تذوقْ.. ويحسّو طيب الكلماتْ

ويدرّق وسط الصندوقْ .. وجيعة واجراح وليعاتْ

                  ومن شافو يظنّو فرحانْ

                    هكّاكّة يعيش الفنّان 

في صباحو يولّي عصفورْ..  يصنع وصلة للعشّاق

وفي ليلو يرجع مقهور ..الوصلة خطفوها السرّاق 

                   ولا من قال هذي لفلانْ 

                       هكّاكا يعيش الفنّانْ 

*هكّاكة : اي هكذا .

الحلّاج الكافي .