"لا يعجبكْ الدّهر لا تتـفـَــــحّرْ*
حتّى تشوف العاقبة في لِخّرْ*" (1)
لا يعجبك الدّهر لا تتعالى
راهي الدنيا خايبة بــدّالة
امشي صحيح مضبوط كِالمُنقالة
لا تقدّم درجْ و لا تتـــأخّرْ
لا يعْجبك الــــــدّهر لا تتفخّرْ
حتى تشوفْ العاقبة في لخّر ْ
لا يعجبك الــدّهر في تـَـــوْقيتو
راهو الزمان غدّار عِشْتْ و ريتو
هذا عصرْ ممسوخ نا سمّيتـــوا
اللّي باعْ حَنظل قالْ بعْتْ السُكّرْ
لا يعجبك الدّهر لا ميـزانو
قداش طاغي ضاع في عنوانو
بعد اللي صال و جال خلّى مكانو
و بات شريد غريب دمعو يُقْطْرْْ
لا يعجبك الدّهر كي يضحكلكْ
راهو صعيب غدّار هاني قُتْلِكْ
كونْ في الزمان فهيم متّنْ متْنكْ
و من كبوة الحصان كونْ امْحَـذّرْ
لا يعحبك الدّهر كي يتبسّم
و اقْرى حساب نهار عابسْ مُعْصِمْ
هذا كلام من العين موش مترجمْ
اذا حبيبكْ خان ، فارِقْ و اخْسِرْ
.......
لا يَعجبك الدهر لا تتـــــــفخّر
حتّى تشوف العاقبة في لِخّرْ*
______________________
(1) - مطلع النصّ مأثورات الوالدة.
* تتْفخّرْ: تفتخر
*لِخّْرْ : في الاخير
-------------------
الحلاّج ...
(مارس ، آذار 2015 )
ليست هناك تعليقات:
إرسال تعليق