المشهد الرّمضاني الثّاني (2)
----------
سي سالمْ*، جُـبّة وبِـدْعيّة.. وطالِـعْ عَـالمَـنبَرْ خَـطـيبْ
يحبّ يولّلي من التَّـقيّـة .. ونَـظـيفْ وأبيـضْ وحْـلِـيبْ
لا عندُو صِـلة بقُـطْعِيّـة .. "فَـرْفُورِي" مَـعَـبِّي بالـطّـيبْ
لا سارقْ لا عِـندُو سَـيَّـة .. لا مْصاحبْ ثعلبْ، لا ذِيـبْ
وزعمة زعمة عَمَلْ مزيّة .. تَـابْ على القَـلْبَة والـعِـيبْ
وتبـرّعْ بمِـيـضَة و ثَـرَيّـا .. ِ لِلْجّامعْ في سيـدي شْعِـيـبْ
وفي الواقع ساقطْ منْ فَـيَّة.. ومخلّطها حُمْصْ معَ زبيبْ
سلِْعةَـ ومْخاَزِنْ مكْـريّـة .. والعِـيشَـة سـرْقـة وتَهْـرِيبْ
------
* سالم : كل تشابه في الاسماء مقصود.
الحلّاج الكافي (تونس، رمضان 2020).
ويقول #الهكواتي Salem Labbène معارضا هذا النص بنفس إيقاعه وبقافية مزدوجة مختلفة:
سي سالم* بدجينو الازرق ... مريوله مخطط بحّار
هو اللي ينهض ويفيّق ... كل الحومة وأهل الدار
للشمس يغني هيا اشرق ... فيسع راهي الدنيا نهار
يتعنى للخدمة ويسبق ... تاكسي وقهواجي وعطار
كي الناس ال تشهق ما تلحق ... عايش من عرقه الشرشار
وما ياكل الا ما يعرّق ... عالدورو قبل الدينار
ذكرك في الأسامي يفرق ... موش كل مكعبر كبّار
معاك شاعر عاشق ويعشّق ... شعره كي سحر السحار
و من داخل لبحوره يغرق ... إلا من يعرف بالكار
————————
* سالم : تطابق الاسماء بين الرجلين مقصود أيضا من أجل حلاوة اللعبة.
#الهكواتي رمضان 2021
-------------
وردّ الحلّاج الكافي على رشقة صديقه الشاعر #الهكواتي سالم اللبّان فقال:
"سي سالم " اللّي أنا ذكرتُو .. مَاهُوشِي "سالم لَـبّـان"ْ
انتَ كادحْ وشاعر متسمّي.. تشمّ اِيدكْ تَصبَحْ شبْعَـانْ
ومِسْتِيـرْ اللّي جابتْ سـالم .. ربّاتـــو في دارْ أمــانْ
لا يخطفْ لا أهل مضَرّه.. كــريم وماهًـوشي منّــانْ
"سي سالم" اِللّي أنا ذكـرتو.. عِـرّة ومكحُوط وجيعانْ
لا عنــدو هِـمّـة لا ذِمَّــة .. ومِ الحشمة عُودو عِريـانْ
إذا السّايل وقِفْ على بابُو .. يُـولّي عيّــاط وخرنَــان
يتْـشقـلـبْ وديمَا يِقْــلِـبْ .. ومِنْ شرُّو تِشْكي الجيرانْ
من مُدّة لبسْ جبّة بيضة ..عَمَلْ فيها " الشّيخ الرّهدانْ"
وهانو فِ الجامع يِتْسَكْبِنْ.. قَالْ "تُـوبَة سيـدي رمضانْ"
---------
وقال الشاعر محمّد مامي Mohamed Mami شاعر تستور في رشق جديد مبدع :
ما دام الحـــلاّج مْعلّـم *** و اللّـبّـــان ولْــد حْـــلال
اسمــح لمـامـي يتكلّـم *** و يحْكي اللّي يُخْطُـر عَ الْبال
بَـايت عَ الْمخْلُـولة يسلّم *** و صُوتُو يشرْقَعْ بالْـمــوّال
باوْجـاعُـو بـايت بتْـألّــم *** قلْـبُــو مِكْـوِي عَ الْـمــلاّل
حـالُـو مْـكَـدّر ربّي يعْـلم *** سُـبحـانُـو مْـبـدّل لَـحْــوالْ
اللّيــل وطُـولُـو بيها يحْـلِـمْ *** قِبْـلِـتْ و عْـطاتُـو الْـمِـيـجـال
زعْـمَـا يـوخّـر و إلاّ يقــدّم *** وإلاّ يُصْأبُـر صبْـر جْـمَــالْ
و إلاّ يـتْـشـجّـعْ و يُــزْدُمْ *** و يقْصـدْهـا في طْـريـق حْلالْ
حْفَـرْ السّـاس و بايِـتْ يِـرْدِمْ *** وقــال على ربّـــي لـعْـمــال
طْـلَـعْلُـو واحد نـاوي يهْـدِم *** واسْـمُــــو سـالـم مِ الأنْـذال
قـرّر الحـلاّج بـاش يُـحْـكُـم *** عْلى خْـسُـودي ما ذاق الفـال
نمّـام و قـهْـدِي يـتْـجلْـطـم *** كِيفُـو كِ يِـتـفَـرْقَــعْ لَـعْـيــال
قال مامي بالْـعَـشْـرَة نُـبْـصُـمْ ** اللّـبّــان مَـا يـدِيـر الْـمُــحَـال
تستور في 2012/04/25
ليست هناك تعليقات:
إرسال تعليق