الحفناوي غْميسْ* وَجَطْلاوي*

 بلاطو الحفْ/ناوي:

______
الحفناوي غْميسْ* وَجَطْلاوي*..عْمَلْ فيها فاهِمْ دِبّيرْ
يا ما قابض برشا رشاوي .. ع فرنك يبوس الخنزير
يقلّكْ مانيشي نهضاوي .. اما عندي النّهضة خيرْ
وفي أصلو طمّاع وناوي .. يولّي رئيس التّحرير
هايضْ وكشاكيشُو رَغَاوي .. وديمة يسخّن ف البنديرْ
ومحضّر كانٌون وجَاوي .. وواعِدْ وِعْدَة لَبُو خِنْفِيرْ*
وهوّ يمدح تقول فداوي .. وحديث وفتوى وتفسيرْ
ياخي خَرَجْلُو قيس يداوي.. مَضْمْضْلُو فُمُّو بِالجِيرْ

-----------------

* غميسْ: لا يحسن عمليات الحساب يأنواعها.

* جَطْلاوي: لا يحسن الرماية ولا حسن الكلام.

* بُوخنفير : أو سيدي بوخنفير وليّ صالح حسب المعتقد بجهتنا السرس.

الحلّاج الكافي. 10 اوت 2021