قالتْ ما ترْقدشِي بكْري...

 

قالتْ ما ترْقدشِي بكْري .. راهٌو نوم اللّيل خسارة.

العُمر قصير وديمة يجري .. ولبْناتْ يحبُّو السهّـارة

واللّي ما تطفـاشي نـاره

لبنَـاتْ يحبُـوا الـسهّـارْ .. واللّي بكلمة يشعّـل نــارْ

ويحبّـوا العـاتي القمّـارّ.. يزدم ما يخاف الحَــزّارة

راهو نوم اللّيل خسارة

لبناتْ يحبّو اِلْ يِسْعِدهمْ .. واللّي ك يغيبوا يفڨـدهمْ

واللّي في ليلو يعبدهم .. وفي اصْباحُـو يذبح كفّـارة

لبنات يحبُّـو السهّـارة

لبنات يحبّوا اللّي يسهر .. واللي يقمّر واللّي يسكـرْ

واللّي كِ ينادواوا يحضرْ .. ومڨـرونُـو معمّر بعمـارهْ

ڨُـتلك نُـوم اللّيل خسَـارهْ

لبنات يحبّوا اِلْ يهواهمْ .. واللي كي ينادوه يجيهم

واللّي مِـتحـزّم لبْـ.ـلاهُم .. ويحضر كي تجيه الإشارة

وللـمَـرسُـول يـمِـدّ بْشَــارَة

لِبْنَـات يحبُّـوا على الخَـالْ ..اللّي يِـدلّلْ ويـزيـد دَلْالْ

وِالْلّي ما يحسبْـشْ المَـالْ..وْلَا يحِبّْ ريَاسَة ولا وْزَارَة وْمِنْ يَرمِي هَـمُّو في شْكَـارة

الحلّاج الكافي

04أوت 2021

لبْنـاتْ يحِبُّـو إللّي يسْـكِـرْ ..

وإللّي يلْـعَـبْ وإللّي يخْسِـرْ

وإللّي يُـدْخـلْ بـرّْ الخَـالـي..

واللّي يغـنّـي وإللّـي يُشْـعُـرْ

وإللّي يشـقّ طـريق صعيبـة

وإللّي سـلاحُـو دِيمَـة معَمَّـرْ

وإللّي "مقـرُونهْ" مُطـاعَــةْ

يضْرب وِيــنْ يِبَــاتْ يِشَبَّـرْ

وإللّي مغْنـاهمْ في غنـاهــمْ

وإلْلّي يِجّلِـبْ زيـنْ المَنْظـرْ

وآلْلِّـي ما يبَـاتِـشْ في دَارَهْ

وميعــاد المــلْـقـى يِتْـذكّــرْ

لٍبْنَــاتْ يحِبُّـــو السَهّـــارَة ..

---------

الحلّاج الكافي (م.ق.)