شاعر ونادي

 

صَابُـو العَـطبْ من عينْ ها الشرّادي

شــاعر هجـرْ النّـادي

مَـرْمي بسهْـم العشـق، باتْ يَـدَادي

***

شَـاعر لحـقْ صبيّـة ..

هَـزّو الغـرام و ساح فَ أرضْ خـليّة

لا زادْ لا زوّادْ لا شَـرْبيّـة

لا خالْ لاحقْ لا خُـو ينـادي

ينشدْ على جـديْ الغَـزال ويـنْ هـيّة

ف أرضْ العَـطش و الشّـوك و الكـرّادي

***

شاعر لحقّ الـرّيم

هزّوا الغرام و ساح ف أرض الغيم

لا رمل لا رمّال لا تنجيمْ

لا جمل يركب لا ظهــر جوادي

لا مسـرّجة لا راحلة لا مقيـمْ

بلاد القـطف و الـذّيب فيها رمادي

شاعر لحق السّمرة

هزّو الغرام تكوى بنار الجمرة

لا هان حبّو لا نساها عِشْرَة

لا مات شايح ولا رواه الغيم

لا بلّْ ريقو لا سقاتو قطرة

ومن طبعا الهجران موش ودَادٍي