آشْ بَاشْ نكْـتـبْ
ع اللّي تستنّى في المركبْ
كُــــلّْ عــشيّة بعْـــد المَغـــربْ ؟
تتمنّى وتنشد في المسربْ
نكْـتبْ عَ صباح البحَّــارهْ ؟
تمنّو الرّبح و حبـّو تجَارهْ
ظنّوها خِـفّة و شْـطارهْ
دخلو البحر و شقُّـو اغْـمارهْ
لا خافـو موجـو و لا اعصَارهْ
عشرة ايّام و أنتِي تستـنّي
لا واحد راجع لـصغــارهْ
و لا من دفّى فَرْشُو و دارهْ
الخبزة مُرَّة .. يا "نـوّاره" ..
آشْ باشْ نِـكْـتِـبْ ؟
عشرة أيّام و أنتِي تحْـسبْ
لا قَضْيَّة .. لا فلوسْ المكْتبْ
كان قلبك عالق يترقّـبْ
مثلك يستنّى فِ أخبارهْ
خايفْ من المُـوجة الغـدّارهْ..
خايفْ منّك ... تسمعْ .. تتْعـبْ
تبْـقى تِـنحـبْ..
على نهار مهبّب مشبشبْ
من صُبْحُـو صَبّحْ بغـبارهْ
.......
نكتبْ ع صباح البحّــــارهْ
نكتب ع دموعك .. "نوّارهْ"
----------
المهدي / الحلّاج الكافي ..
ليست هناك تعليقات:
إرسال تعليق