الى رئيس الجمهوريّة تحـديدا :
حسّيتـكْ بايتْ تٍتْقـلّى .. ودايِـخْ بالرّعشَـة مَرْجُــوفْ
صعُـبْ عليك الأمـر بِكُلّه ..من العيّـاري للمخلُـوفْ
من النّهضة ركبتنا العِلّهْ.. وأنتَ باقي هَـاكْ تشُوفْ
أما خافْ وانسَى الطـلّهْ .وإلّا طُُـلْ وانسَى الخُـوفْ
الحلّاج الكـافي.
ويقول الشاعر محمّد مامي Mohamed Mami في السّياق:
و من زكّى زاد صام و صلّى * في مكّة لازم يطوف//
و اللّي حفظ دروسو بالملّة * يتعلّم يكتب الحروف //
ما تكونش كِ نار الجّلَّة * تطْفى و ما تجمّر مسفوف //
ماهياش لعبة كرة السلّة* و لا هي لعبة الخــذروف //
و الهندي سلطان الغلّة * يبري من جرْيان الجّـــوف//
و كان باقي ناوي تتسلّى * تخاف يولّي مُولُوتُــوف //
النّاس هاذم لا يخافوا اللّه * و ينسوا الأمر بالمعْرُوف//
و نوحل كالمنجل في القُلّة * فحجة و نطيح في الهفهُــوف..
وتقول الشاعرة زهرة الحواشي Zohra Zhayra Hawachi في هذا الصدد:
تْحسُّو مْخَرتلْ موشْ متأكِّدْ
يُوقفْ و ِالاّ يتَّكَّا
وِ يباتْ يْبَزّعْ و ِيلَقِّطْ
زعْمة هكَّا وِ الا َّهـكَّا
خُوفي يَطْلعْ عنْدو الزّهايْمرْ
والقصَر يشْوفُو بِيتْ مكَّـة !
ليست هناك تعليقات:
إرسال تعليق