توحّشتك... (اشتقت اليك)
توحّشتك و اللّيلة ظلمه
و نجماتي غابو في سمايا
طار نعاسي،
و بعثتْ الرّوح تناديلك
و تمنّيتك تبدى معايا
تتدودّدلي و تتحنّنلي
و تمسح دمعي يا سعفايا
و في ليلات البرد "الكافي" *
تولّليلي فراشي و غطايا
***
جيت نشْكيلكْ
با مشْكايا
طال جفايا
و ترجّيت تصون هوايا
و كونْ دوايا
و باتي المغْنى في مغْنايا
يا مشكاكة با نسّايا
أنتي تعرف قلبي صافي
مثْل مرايا
و انتي تعرفْ حضني دافي
بحْمي و واسع
مالو نهايا
كنْتي صبْحي و كنْتي مسايا
و كنتي عطشي و كنتي روايا
ونهار اللي ما تففقّدتكْ
و ما حضّنتكْ
مشي في بالي ديمة معايا
ديمة قدّامي و ورايا
عجّلتي قلْتي الحكايا
و ضاع طريقك بين ثنايا
يا مهبولة يا نسّايا
***
توحّشتك و اللّيلة طويلة
و مالي حيلة
و مالي طريقْ..
و أنتي ما بلّيتي الرّيق
جيب فتيلة
وقت فراقه
نضوّي ع طريق العشّاقه
ليلة بليله
خدّك ينثر في قناديله
و يشعشع نورك يشملني
و ددّشني و تمشّيني
و ع الزّند صغير ، تكّيني
و تغطّيني و تهدّيني
ليلة بليله
ياللي انتي ديمة بخيله
نفسي عليله
داويني ما عندي حيله
و انتي تعرف
و ديمة نقلّك :
عدّلت الوقت بتعديله
نرحل مع موجات بحوري
و ما نموتش و الذات عليلة
و روحي ذليله
***
توحّشت نشوفك يا فلانة ..
كون معانا
و يزّي من تعليل جفانا
يا مولانا
يا مضوّي طريق التبّانا*
سخّر هاللي قلبو جافي
يروف و يعطف..
و نتمنّاه و يتمنّانا
قبلْ امْنيتي* ما تناديلي
و نلحق ع رقود الجبّانا*
توحّشت نشوفك يا فلانة
__________________________________
الحلاّج... (اوت 1013)
*طريق التّبانا: مجموعة من النجوم اللّيلية (Voie lactée) أو milky way galaxy
* البرد الكافي : نسبة لمدينتي "الكاف" المشهروة بالثلج و البرد ليلا في فصل الشتاء.
* امنيتي : منيّيتي او موتي .
* رقود الجبانة : ساكني المقبرة من الاموات .
ليست هناك تعليقات:
إرسال تعليق