طالتْ علينا المُـــــدّة و هاوْ فاتنا اللّي فـاتْ
و اللّي مَضَى ما تِعِـدَّهْ لا سنينْ لا نهــــاراتْ
و اللّي رحلْ ماتـردّه خلّيه للـــــــــــــغُرْبَاتْ
و اللي روحك عنده حَاذيه في الخُطْـــــواتْ
لا تغضّبُو و لا تُصُدّه ولو العُيُون بَكَــــــــاتْ
خلّيه وقت الــــــشِدّهْ يتعلّم الشّــــــــــدّاتْ
حتّى الفراق بالعـدّة لا تعجّل الأوقــــــــاتْ
و العشق ليس هـدره وتوجيـع باللّيعـــــاتْ
و الحبّ ليس غدره الحبّ خوذ و هـــــاتْ
نهـار لوْجَـاعْ و الـرّجّه ناديتهَـا ما جــــــــاتْ
” كان النّواح بالطَلْبة ... لا يَـرحمْ اللّي مـَــاتْ" *
------
* مثل شعبي تونسي يعني انه ، أوْلى للميّت ان يموت بلا بكاء و حزن عليه .. من موتٍ بحزن مُفتعل و كاذب و بالطّلب .
---------------
الحلاّج الكافي / المهدي .
ليست هناك تعليقات:
إرسال تعليق