ســاعــات ..

 

قالت الصديقة شاعرة دير الكاف حنان علوي Hanene Aloui:

--------

ساعات نحمل في حمول الزايلة*

وساعات حمل الريش نعجز فيه*

وساعات نغدى في النهار والقايلة*

وساعات حتى الليل نخبر فيه*

وساعات نضحك والمدامع سايلة*

وساعات يوم الفرح نبكي فيه*

وساعات تعجبني البعيد فعايلة*

وساعات حتى خويا ننكر فيه*

-------

وقلت تماهيا مع نصّها الجميل:

****

ساعاتْ نعْـدل فِ الحمُـول المايلة

ونشيــلْ هَـمّ النّـــاس وامَّــالـيـه

ساعات نسفـر فِ الفجوج الخالية

وساعات نخاف م البيت واللّي فيه

وساعات نحكم و المحاكم عالية

ساعات نخـافْ الفـارْ و نْبــاريهْ

ساعات نشربْ ودلوتي ف الدّالية

وساعات بَلّ الــرّيق ما نْـــلاڨـيه

وساعات نحصد والسّبـولة مَاليَـة

وساعات نحـسّ الجُـوع ونعَـانيهْ

وساعات نبْع الشّعْـر مِياهُو سَـايِـلة

و ساعات ننسى الڨـولْ، مَا ندْريهْ

------

* الحلّاج الكافي…

23 اكتوبر 2018