شَـــــــــهْـــوة
----------------------------------------
توحّْشتْ نُشُوفكْ يا فْـلَانا *..
كُوني مَعَانا
و يـزّْي* من تعْـليلْ جَـفَـانا
يا مَـولانَا
يا مضوّي طريقْ التـبّانا*
سخّر هاللي قلبو جافي
يروفْ و يعْـطفْ..
و نتْمنّاهْ و يتْمنَّـانَا
قبلْ مِـنِيتي ما تْنَاديلي
و نلحقْ ع رقُـود الجَـبّانَا*
توحّْشتْ نشُوفِـكْ يا فَـلانا
توحّشتك...
توحّشتك و اللّيلة ظلمه
و نجماتي غابو في سمايا
طار نعاسي،
طار غفايا
و بعثتْ الرّوح تناديلك
و تمنّيتك تبدى معايا
تتوددّلي و تتحنّنلي
و تمسحْ دمْعي يا سعفايا
و في ليلات البرد "الكافي"
تولّليلي فراشي و غطايا
جيت نشكيلك
با مشكايا
طالْ جََفَايا
و نتْرجَّاكْ تَصُونْ هَوَايَـا
و كونْ دوايا
و كلّ المغنى في مغنايا
يا مشكاكة با نسّايا
أنْتِي تَعْرَفْْ قَلْبِي صَافِي
مثْل مَرَايَـا
و انتي تعرفْ حِضْنِي دَافِي
بَحْمِي و واَِسِعْ
مََالُو نَهَايَـا
كنتي صبحي و كنتي مسايا
و كنتي عطشي و كنتي روايا
ونهار اللي ما تفقّدتك
و ما حضّنتك ...
مشي في بالي ديمة معايا
ديمة قدّامي و ورايا
عجّلتي قلتي الحكايا
و ضاع طريقك بين ثنايا
يامهبولة يا نسّايا...
***
توحّشتك و اللّيلة طويلة
مالي طريقْ..
و أنتي ما بلّيتي الرّيق
لا ضوء و لا ريت فتيلة
وقت فراقه
تضوّي ع طريق العشّاقه
ليلة بليله
كان خدّك تضوى قَنَادِيلَهْ
و يشعشع نورك يشملني
و تددّشْني و تَمَشّينِي
و عَ زّند طريّ تكّيني
و تغطّيني و تهدّيني
ليلة بليله
ياللي انتي ديمة بخيله
شوفي ولّتْ نفسي عليله
داويني ما عندي حيله
و انتي تقدر
و ديمة تقل لي
عدّلت الوقت بتعديله
نرحل مع موجات بحوري
و ما نموتش و الذات عليلة
و روحي ذليله
***
توحّْشتْ نُشُوفكْ يا فْلَانا ..
كُوني مَعَانا
و يـزّْي من تعليل جفانا
يا مولانا
يا مضوّي طريق التبّانا
سخّر هاللي قلبو جافي
يروف و يعطف..
و نتْمنّاهْ و يتْمنانَا
قبلْ مِـنِيتي ما تْنَاديلي
و نلحقْ ع رقُـود الجَـبّانَا*
توحّْشتْ نشُوفك يا فَـلانا
------------------------------------------------
الحلاّج... (أوت 2013)
* الجبّانة : المقبرة
* يِــزِّي : يكفي .
------------------------------------------------
الحلاّج... (أوت 2013)
* الجبّانة : المقبرة
* طريق التبّانا : La voie lactée
* يِــزِّي : يكفي .
* فْـلانا : فُلانة ..
ليست هناك تعليقات:
إرسال تعليق