1)
كانْ جا ليديّا
نِشْعلْ في ليلكْ
ك نجْم الثّريّا
نضوّي الثنيّا
و في عزّ صيفكْ
نوللي مطر
تسبق خريفكْ
و نوللي ظلكْ
صباح وعَشيّا
يا ناسيا
و يا خايفا
ورْدي هديّا
يا للّي في العشق
ما زلت بنيّا ..
و فِ وسْط أرضك ْ
خضْرا طريّا ...
***
(2)
و كان جاء بيدي
نفطّرك مّريّش معسّل
و كرموش زيدي
و تصبح عندي
كِِ هلال عيدي
و قمحي البيدي
صافي مزرّدْ
أصفر مورّدْ
مثل خدّ الضّاوي
والاّ صدركْ
بحْر الشّهاوي
و مازلت ناوي
نبقى بجنبك
عطشان و راوي
مثل ما تريدي
و كان جاء بيدي
****
(3)
و كان جيت داري ..
نطفي جماركْ
و حرّكْ و ناري
ونسمع أعذارك
وتفهم اعذاري
وندخلو بلاد الخلاء و البراري
ونذوق ثماركْ
وتعرف اثماري
أصل المحبّة يا بنتْ جاري
نعيشو فرادى
وداركْ داري
وكان جيت نعرفْ و نفهمْ وداري
الحلّاج الكافي
15 سبتمبر 2014
ليست هناك تعليقات:
إرسال تعليق